Слава в вышних Богу, и на земли мир, в человецех благоволение. Хвалим Тя, благословим Тя (поклон), кланяемтися, славословим Тя (поклон), благодарим Тя, великия ради славы Твоея (поклон). Господи, Царю небесныи. Боже Отче Вседержителю, и Господи Сыне Единородныи, Исусе Христе, и Святый Душе. Господи Боже Агньче Божии, Сыне Отечь, вземляи грех мiра, помилуй нас, Вземляи грехи мiра, приими молитвы наша; седяи одесную Отца, помилуй нас. Яко Ты еси Един Свят, Ты еси Един Господь, Исус Христос, в славу Богу Отцу, аминь.
На всяк день благословим Тя, и восхвалим имя Твое во веки и в век века.
Господи, прибежище бысть нам в род и род. Аз рех: Господи, помилуй мя, и исцели душу мою, яко согреших Тебе. Господи, к Тебе прибегох, научи мя творити волю Твою, яко Ты еси Бог мой. Яко от Тебе есть источник живота, во свете Твоем узрим свет. Пробави милость Твою ведущим Тя.
Сподоби, Господи, в день сей без греха сохранитися нам. Благословен еси, Господи, Боже отец наших, и хвально, и прославлено имя Твое во веки, аминь.
Буди, Господи, милость Твоя на нас, якоже уповахом на Тя. Благословен еси, Господи, научи нас оправданием Твоим. Благословен еси, Владыко, вразуми нас оправданием Твоим. Благословен еси, Святыи, просвети нас оправданием Твоими.
Господи, милость Твоя во веки, и дела руку Твоею не презри. Тебе подобает хвала, Тебе подобает пение, Тебе слава подобает, Отцу, и Сыну, и Святому Духу, ныне и присно и во веки веком, аминь. Молитва великаго Евстратия.
Величая величаю Тя Господи, яко призрел еси на смирение мое, и неси мене затворил в руках вражиих, но спасл еси от бед душу мою. И ныне Владыко, да покрыет мя рука Твоя, и да приидет на мя милость Твоя, яко смятеся душа моя, и болезненна есть во исхождении своем, от окаяннаго ми и смраднаго телесе сего. Да некогда лукавыи супостата совет срящет, и препнет ю во тьме, за неведомыя и ведомыя в житии сем бывшия ми грехи. Милостив ми буди, Владыко, и да не узрит душа моя темнаго взора лукавых бесов, но да приимут ю ангели Твои светлии и пресветлии. Даждь славу имени Твоему святому, и Твоею силою возведи мя на божественныи Твой суд. Внегда судитимися, да не приимет мене рука князя мiра сего, исторгнути мя грешника во глубину адову. Но предстани ми, и буди мой Спаситель и Заступник. Телесныя бо сия муки, веселие суть рабом Твоим. Помилуй, Господи, осквернившуюся страстьми жттия сего душу мою, и чисту ю ради покаяния и исповедания приими. Яко благословен еси во веки веком, аминь.
Таже, Трисвятое, и по Отче наш.
Молитва Исусова.
Тропари, глас 8.
Оком милосердым Господи, виждь мое смирение. Яко по малу жизнь моя скончевается, и от дел несть спасения. Сего ради молюся: оком благоутробным Ти Господи, виждь смирение мое и спаси мя.
Слава: Век мой скончавается, и страшный Твой престол готовится, житие мое мимо ходит, суд мене ждет, претя мне огненною мукою, и пламенем негасимым. Слезам тучу подаждь ми и угаси его силу, хотяи спастися всем человеком.
И ныне: Иже нас ради рождеися от Девы, и распятие претерпев, Благии, испровергии смертию смерть, и воскресение явлеи, яко Бог. Не презри их же созда рукою Своею. Яви человеколюбие Свое, Милостиве. Приими Рождьшую Тя Богородицу молящуюся за ны, и спаси Спасе наш, люди согрешшыя.
Таже, Господи помилуй, (30).
Честнейшую херувим, и славнейшую воистину серафим, без истления Бога, Слова рождьшую, сущую Богородицу Тя величаем. (поклон).
Слава Отцу и Сыну и Святому Духу (поклон), и ныне и присно и во веки веком, аминь (поклон).
Господи помилуй, Господи помилуй, Господи благослови (поклон).
И отпуст:
Господи Исусе Христе, Сыне Божии, молитв ради Пречистыя Твоея Матере, и преподобных и богоносных отец наших, и всех ради святых, помилуй и спаси мя грешнаго, яко Благ и Человеколюбец. Аминь.
Затем — прощение.
Аще ли пост, творим поклоны по преждеписанному.
По 17 поклонех Слава, и ныне.
Господи помилуй (дважды), Господи благослови (без поклонов).
И отпуст псалтырный:
Господи Исусе Христе, Сыне Божии, молитв ради Пречистыя Твоея Матере, Силою Честнаго и Животворящаго Креста, и святых небесных сил безплотных, и преподобных и богоносных отец наших, и святаго пророка Давыда (и святаго, его же есть день) и всех святых, помилуй и спаси мя грешнаго, яко Благ и Человеколюбец. Аминь.
И прощение. Наклонившись до земли, не крестясь, читай:
Ослаби, остави, отпусти Боже, согрешения моя, вольная и невольная, яже в слове и в деле, и яже в ведении и не в ведении, яже во уме и в помышлении, яже во дни и в нощи, вся ми прости, яко Благ и Человеколюбец, аминь.
Вставши, читай молитву сию с поклонами:
Ненавидящих и обидящих нас прости, Господи Человеколюбче. Благотворящим благо сотвори, братиям и всем сродником нашим, иже и уединившимся, даруй им вся, яже ко спасению прошения и живот вечныи (поклон).
В болезнех сущия посети и исцели, в темницах сущих свободи, по водам плавающим Правитель буди и иже в путех шествующим исправи и поспеши (поклон).
Помяни Господи, и плененныя братию нашу, единоверных православныя веры, и избави их всякаго злаго обстояния (поклон).
Помилуй Господи, давших нам милостыню и заповедавших нам, недостойным, молитися о них, прости их и помилуй (поклон).
Помилуй Господи, труждающихся и служащих нам, милующих и питающих нас, и даруй им вся, яже ко спасению, прошения и живот вечныи (поклон).
Помяни Господи, прежде отшедшия отцы и братию нашу и всели их, идеже присещает свет лица Твоего (поклон).
Помяни Господи, и нашу худость и убожество, и просвети наш ум светом разума святаго Евангелия Твоего, и настави нас на стезю заповедей Твоих, молитвами Пречистыя Твоея Матере и всех святых Твоих, аминь (поклон).
Господи помилуй (трижды).
И обычные исходные поклоны.
Келейное правило
Начало правилу келейному.
Подобает ведати, како начати правило свое в келии. Став убо на обычном своем месте, сотвори со смирением сердца и сокрушенным помыслом поклоны до земли, глаголя сице:
1. Боже, очисти мя, грешнаго, и помилуй мя (поклон).
2. Создавыи мя, Господи, помилуй мя (поклон).
3. Без числа согреших, Господи, прости мя (поклон).
4. Боже, милости буди мне, грешному (поклон).
5. Боже, прости беззакония моя и согрешения (поклон).
6. Пресвятая Владычице моя Богородице, помилуй мя и спаси мя, и помози ми ныне в жизни сей, и во исход души моея, и в будущем веце (поклон).
7. Непобедимая и божественная сила, честнаго и животворящаго Креста Господня, не остави мя, грешнаго, уповающаго на тя (поклон).
8. Вся небесныя силы, святии ангели и архангели, херувими и серафими, помилуйте мя и помолитеся о мне, грешнем, ко Господу Богу, и помозите ми ныне, в жизни сей, и во исход души моея, и в будущем веце (поклон).
9. Ангеле Христов, хранителю мой святыи, помилуй мя и помолися о мне грешнем ко Господу Богу, и помози ми ныне, в жизни сей, и во исход души моея, и в будущем веце (поклон).
10. Святыи великии Иоанне, пророче и Предотече Господень, помилуй мя и помолися о мне грешнем ко Господу Богу, и помози ми ныне, в жизни сей, и во исход души моея, и в будущем веце (поклон).
11. Святии славнии апостоли, пророцы и мученицы, святителие, лреподобнии и праведнии и вси святии, помилуйте мя и помолитеся о мне грешнем ко Господу Богу, и помозите ми ныне, в жизни сей, и во исход души моея, и в будущем веце (поклон).
12. Господи, или словом, или делом, или помышлением, согреших во всей жизни моей, помилуй мя и прости мя милости Твоея ради (поклон).
Посем, молитва святаго Макария, 1-я
Боже, очисти мя, грешнаго, яко николиже благо сотворих пред Тобою, но избави мя от лукаваго, и да будет во мне воля Твоя, да неосужденно отверзу уста моя недостойная, и восхвалю имя Твое святое, Отца и Сына и Святаго Духа, ныне и присно и во веки веком. Аминь.
Молитва 2-я, святаго Исаака Сириянина
Господи Исусе Христе Боже мой, посещаяи тварь Свою, Тебе явлены страсти моя, и немощь естества моего, и крепость супостата моего. Ты Сам, Владыко, покрый мя от злобы его, занеже сила его крепка и естество мое страстно, и сила немощна. Ты убо Благии, ведыи немощь мою, иже нося неудобьство безсилия моего, сохрани мя от помысла смущена, и потопа страстей, и достойна мя сотвори, сея службы святыя, да не како в страстех моих растлю сладость ея, и обрящуся безстуден пред Тобою и дерзостив. Но милостию Си помилуй мя, яко благословен еси во веки. Аминь.
