Читаем без скачивания Преподобный Феодор Студит. Книга 3. Письма. Творения гимнографические. Эпиграммы. Слова - Феодор Студит

Богородичен: Чудо Рождества Твоего удивляет мя Всенепорочная, како зачинаеши безсеменно необыменнаго: рцы, како девствуеши рождши яко Мати? Еже паче естества верою прием, Рожденному поклонися: елика хощет бо, и может.

Ексапостиларий: Страшный день Суда, и неизреченныя Твоея славы, помышляя трепещу Господи всяко, и трясыйся страхом вопию: на землю егда приидеши судити Христе Боже всяческая со славою, от всякаго избави мя мучения, одесную Тебе Владыко сподобивый мя стати.

Се день грядет Господа Вседержителя, и кто стерпит страх пришествия онаго? День бо ярости есть, и пещь горящая, воньже Судия сядет, и по достоянию деяний комужде отдаяй.

Богородичен: Час испытания, и страшнаго пришествия Человеколюбца Владыки помышляя, весь трепещу, и сетуя, вопию Ти: Судие мой праведнейший, и едине Многомилостиве, кающася приими мя Богородицы молитвами.

Помышляю день оный и час, егда имамы вси нази и яко осуждени, неумытному Судии предстати, тогда труба возшумит вельми, и основания земли подвижатся, и мертвии от гробов воскреснут, и возрастом единем вси будут, и всех тайная явленна предстанут пред Тобою и возрыдают, и восплачутся, и во огнь кромешный отыдут, иже никогдаже покаяшася: и в радость и веселие, праведных жребий внидет в чертог Небесный.

О каковый час тогда, и день страшный, егда сядет Судия на престоле страшном! Книги разгибаются, и деяния обличаются, и тайная тьмы явлена бывают, Ангели обтекают, собирающе вся языки. Приидите, услышите царие и князи, раби и свободни, грешницы и праведницы, богатии и нищии: яко грядет Судия, хотяй судити всей вселенней. И кто претерпит пред лицем Его, егда Ангели предстанут обличающе деяния, помышления, и мысли, яже в нощи и во дни? О каковый час тогда! Но прежде даже не приспеет кончина, потщися зовущи душе: Боже, обратив спаси мя, яко един благоутробен.

Даниил пророк, муж желаний быв (Дан. 10:11), властительное Божие видев, сице вопияше: Судия седе, и книги разгнушася (Дан. 7:10). Блюди душе моя, постиши ли ся? Ближняго твоего не презри. От брашен воздержиши ли ся? Брата твоего не осуждай: да не во огнь отсылаема сгориши яко воск, но да без поткновения введет тя Христос в Царствие Свое.

Предочистим себе братие, царицею добродетелей[1664]: се бо прииде, богатство нам благих подающи: страстей утоляет дмения[1665], и Владыце примиряет прегрешившия. Темже с веселием сию приимем, вопиюще Христу Богу: воскресый из мертвых, неосуждены нас сохрани, славословящия Тя единаго Безгрешнаго.

В понедельник сырной седмицы

Песнь 1

Ирмос: Песнь победную поим вси Богу, сотворшему дивная чудеса мышцею высокою, и спасшему Израиля, яко прославися.

Се предотверзеся покаяния дверь боголюбцы: приидите убо, потщимся внити тою, прежде даже не заключит сию Христос, яко недостойным нам.

Весну возвещающая приближися сия, ныне предочистительная седмица всечестная, священных постов, телеса и души всех просвещающая.

Троичен: Неслитная, несозданная, Троице Святая, Единице преблагая, Отче, и Сыне, и Душе сродный, покланяющияся Тебе верно, присно спасай.

Богородичен: Победишася, Всечестная, в Тебе пределы Дево естества: пребываеши бо рождши без мужа Бога, якоже прежде рождества Чистая, паки невредима.

Песнь 8

Ирмос: Песнь Тебе приносим безплотных, якоже отроцы в пещи, и поюще глаголем: благословите вся дела Господня Господа (Дан. 3:57).

Сие время есть покаяния, темже благомудренно начнем братие, вопиюще: благословите дела Господня Господа.

Днесь брашен отрекшеся, потщимся делом и прегрешений достойно каятися: благословите дела Господня Господа.

Троичен: Слава Тебе невидимая Троице Святая, во Единице покланяемая, Юже верно славим: спасай рабы Твоя от всякаго вреда.

Богородичен: Радуйся всеблаженная Чистая Дево: радуйся Господня Рабо, и Мати: радуйся покрове мира Богородице благословенная, Марие всесветлая.

Песнь 9

Ирмос: Тебе виденую дверь Иезекиилем пророком, Еюже никтоже пройде, токмо Бог един, Богородице Дево, песньми почитаем.

Введеся время душе моя покаяния, не небрези: алчущим даждь хлеб, молися Господеви на всякий день, и нощь, и час, да спасет тя.

Мяс, и прочих брашен якоже удаление сотворихом, тако и всякия вражды к ближним вкупе, блуда же и лжи, и всякия злобы убежим.

Троичен: Единому покланяюся Естеством безначальному Божеству, треми же Лицами славлю в Троице Единицу нераздельную, и сопрестольную.

Богородичен: Ты еси верных Дево похвала, упование и предстательство: Тя песньми пений славим непрестанно Богородице Марие, спаси рабы Твоя.

Во вторник сырной седмицы

Песнь 2

Ирмос: Внемлите людие Мои закону Моему, приклоните ухо ваше во глаголы уст Моих (Пс. 77:1): яко имя Твое Господи, призвах (Пс. 114:2).

Время покаяния наста, потщимся христолюбцы очиститися всех прегрешений, и явитися Владыце блаженни.

Пост чистый, безгрешный потщимся совершити ныне непрестанно, да обрящем прегрешений оставление.

Еси бо Христе Многомилостив всех Блаже, присно приемляй в покаяние: темже вси Тя присно славим.

Троичен: Троицу во Единице прославим, несекомую, неслиянну, нераздельну Существом, раздельна же Лицы Бога.

Богородичен: Чистая Дево Мати, умоли, Егоже воплотила еси яко Человека Дево, и Слова: да спасет от бед рабы Твоя.

Песнь 8

Ирмос: В купине Моисею Девы чудо, на Синайстей горе, прообразившаго иногда, пойте, благословите и превозносите во вся веки.

Предочистимся ныне, не брашны токмо, но и деяньми, и начнем вернии теплым помышлением: да Создателю светли явимся во веки.

Сице нам поститися подобает, не во вражде и брани, не в зависти и рвении, не во тщеславии и лести сокровенней, но якоже Христос, в смиренномудрии.

Милующии, рече нищия, Спасу взаим дают разумно (Притч. 19:17). О радости неуподобимыя! подает бо богатно воздаяния добрых, во вся веки.

Троичен: Слава Отцу, и Сыну, и Святому Духу: един бо Бог, три. Со Ангелы непрестанно человецы восхваляем Тя, Всесвятая Троице: во вся веки.

Богородичен: Радуйся Дево Чистая Богородице Марие, очистилище мира, православных рог, моли избавитися от негасимаго огня, Тя славословящим во вся веки.

Песнь 9

Ирмос: Девство Твое Богородице Нескверная, еже не опали огнь Божественный, величаем.

Ныне предочистимся в посте и слезах, и в велиих исправлениих, да обрящем велию милость.

Ныне подражаим мудрыя девы христолюбцы, и потщимся Христа усрести со свещами светлыми (Мф. 25:1-13).

Ныне подражаим Илию постившася, и бежавша от лукавыя Иезавели, да тако вознесемся от земли.

Троичен: Святый, Святый, Святый, Трисвятый, Отче Вседержителю, и Сыне Единосущне со Духом, едино Божество.

Богородичен: О Тебе хвалимся, и к Тебе прибегаем, Чистая, Приснодево Честная, мучения избави вся ны.

В среду сырной седмицы

Песнь 3

Ирмос: Неплодствовавший мой ум, плодоносен Боже покажи ми, делателю добрых, насадителю благих, благоутробием Твоим.

Вознесшуся Ти Спасе, волею на Крест, вся тварь земная подвижеся, и раздрася храмная завеса (Мф. 27:51).

Уязвился еси на Кресте Иисусе мой мене ради, и прободен в ребра Блаже: отнюдуже верою покланяюся Божественней державе Твоей.

Троичен: Преклонь колена на землю, Отцу, покланяюся, Сына славлю, и Духа воспеваю, единовольное начало, и Триипостасное.

Богородичен: Непостижимо есть таинство Чистая, Твоего рождения: раждаеши бо Марие неискусомужно Бога, и пребываеши нетленна.

Постное время, силою Твоею Христе, освятив, спаси вся ны сетей вражиих, покланяющияся Тебе.

Песнь 8

Ирмос: В купине Моисею Девы чудо, на Синайстей горе, прообразившаго иногда, пойте, благословите, и превозносите во вся веки.

Вознесыйся на Крест всех Владыко, Адама со Евою паки воззвал еси, и в рай Христе Спасе ввел еси, Тя воспевающия во вся веки.

Тебе вознесшуся Христе на Крест волею, лучи солнечныя страхом помрачишася, и зайде день (Лк. 23:45): отонудуже Тя разбойник Бога исповеда во вся веки (Лк. 23:42).

Троичен: Равна Отцу Сына, и Святаго Духа веровахом быти Святую Троицу в Божестве едином: Ейже верою покланяемся, Ариево учение присно попирающе.