Величание
Ублажаем тя, преподобне отче Антоние, и чтим святую память твою, наставниче монахов и собеседниче Ангелов.
Молитвы преподобному Нилу Столобенскому
Молитва первая
из службы
О великий угодниче, преславный чудотворче, собраннаго зде о тебе стада Христова добрый пастырю и обители сея Богом данный начальниче, Ниле всеблаженне! Душею на небеси престолу Божию предстояй и Троичныя славы наслаждаяйся, телом же на земли в божественнем храме сем почиваяй и от Него данною ти свыше благодатию различная источаяй чудеса, призри милостивым оком на предстоящия честней твоей раце люди и просящия сильныя твоея помощи. Се бо мы, в безмерных согрешениих осквернившиися и в тине страстей присно вдающиися, праведный гнев Божий на себе наведохом и всякия милости недостойны сотворихомся, темже и не смеюще возвести очес наших к высоте небесней, ниже вознести молебный глас, сердцем сокрушенным и духом смиренным тебе в ходатайство и пособие призываем. Ты убо, яко стяжавый дерзновение, воздвигни горе преподобныя твоя руце, якоже иногда чудный оный Моисей Боговидец, Амалика побеждаяй, простер ко Господу Творцу всех и Богу теплую свою молитву, испроси Церкви благостояние, воздуха благорастворение, земли плодоносие. Избави же всех, верою несумненною к Богу приходящих и многоцелебныя мощи твоя благоговейно почитающих, от всяких бед душевных и телесных, от всех томлений и прилогов диавольских. Буди печальным утешитель, недугующим врач, напаствуемым помощник, нагим покровитель, вдовицам заступник, сирым защитник, младенцем питатель, старым укрепитель, странствующим путевождь, плавающим кормчий и исходатайствуй всем, крепкия помощи твоея усердне требующим, вся, яже ко спасению полезная. Яко да твоими молитвами наставляеми, путь на земли маловременнаго жития нашего безбедне совершим, улучим же на небеси некончаемый покой и прославим купно с тобою всех благих Дателя, единаго в Троице славимаго Бога, Отца и Сына и Святаго Духа, ныне и присно и во веки веков. Аминь.
Молитва вторая,
чтомая в Ниловой пустыни Тверской епархии
О преподобне и богоблаженне, пастырю и начальниче, отче Ниле! Яко имеяй дерзновение ко Владыце Христу и ко Пречистей Его Матери, Пресвятей Богородице, буди молитвенник и помощник и ходатай о нас недостойных, живущих во святей обители сей, еяже богоизбранней дружине ты начальник являешися, и о приходящих с верою к цельбоносным мощем твоим. Буди помогая и заступая от злаго нашего сопротивника, яко да твоими молитвами, пребывающии на месте сем, и приходящии с верою к раце мощей твоих, и на всяком месте призывающии тя на помощь, невредими будем от бесов и злых человек, славу и благодарение возсылающе Отцу и Сыну и Святому Духу, ныне и присно и во веки веков. Аминь.
Тропарь преподобному Нилу Столобенскому, глас 4
Яко светильник всесветел явился еси во острове Селигера езера, преподобне отче Ниле: ты бо Крест Христов от юности своея на раму взем, усердно Тому последовал еси, чистотою Богови приближився, отонудуже и чудес дарованием обогатился еси. Тем и мы, притекающих к раце мощей твоих, умильно глаголем: отче преподобне, моли Христа Бога спастися душам нашим.
Кондак, глас 8
Отечества, преподобне, удалився, в пустыню вселился еси, и на остров Селигера езера возшед, жестоко житие показал еси, и многих добродетельми удивив, дарования чудес от Христа приял еси. Поминай нас, чтущих память твою, да зовем ти: радуйся, Ниле отче наш.
Величание
Ублажаем тя, преподобне отче Ниле, и чтим святую память твою, наставниче монахов и собеседниче Ангелов.
8/21 декабря
Преподобного Кирилла Челмогорского (Челменского) и Каргополъского, чудотворца, просветителя чуди (1367).
Молитва преподобному Кириллу Челмогорскому
из службы
О блаженная и пречестная и благодати Святаго Духа исполненная главо, сосуде избранный Святыя Троицы, преподобне отче наш Кирилле, услыши нас, грешных, предстоящих ныне пред тобою и умильно молящих тя: помолися о нас, рабех твоих, ко Всемилостивому Владыце Иисусу Христу Богу нашему и Его рождшей Матери, Владычице нашей Богородице и Приснодеве Марии, еже отпустити нам согрешения наша, яже содеяхом. Вемы бо, отче наш, аще плотию и в персти почиваеши, но духом зде с нами неотступно и невидимо пребываеши, назирая нас и назидая по твоему неложному обещанию, сохраняеши от всяких обстояний. И якоже много дерзновение стяжавый ко Господу постническими твоими подвиги, умоли Его святыми твоими молитвами подати миру мир, Церкви Его Святей – единомыслие, стране – на враги победу, служащим же ти – друг ко другу любовь и согласие и всем людем, притекающим к тебе с верою, испроси у Господа к пользе душевней и телесней милость, мир, благословение, во еже избавитися нам всем в День Судный страшный, шуия части спастися, стати же одесную со избранными Его к наследию Царствия Небеснаго, яко Тому подобает всякая слава, честь и поклонение со Безначальным Его Отцем и Пресвятым и Благим и Животворящим Его Духом ныне, и присно, и во веки веков. Аминь.
Тропарь преподобному Кириллу Челмогорскому, просветителю чуди, глас 4
Днесь возсия нам пресветлая память твоя, славне, яко солнце светозарное, лучами благодати озаряющи весь мир и тьму нощи злых духов и от нас отгоняющи. Днесь Небесныя силы святых ангел, и мирский народ, и души праведных мысленно торжествуют, радующеся; днесь и мы, грешнии, припадающе молимся: отче преподобне Кирилле, Христа Бога моли непрестанно спасти обитель твою, град и люди, иже любезно тебе почитающия.
Кондак, глас 8
От юности, преподобне, вся оставль житейская, красная же и лепотная и в пустыню вселився, усердно последовал еси Звавшему тебе, преблаженне, в трудех же и постех, отче, тело свое изнурил еси, отонудуже тя пастыря Своим овцам добре устрояет всебогатый Господь, Кирилле чудодейственниче, моли Христа Бога о приходящих с верою и просящих своих прегрешений оставления даровати, чтущим любовию святую память твою.
Величание
Ублажаем тя, преподобне отче Кирилле, и чтим святую память твою, наставниче монахов и собеседниче Ангелов.
9/22 декабря
Зачатие праведной Анною Пресвятой Богородицы.
Иконы Божией Матери, именуемой «Нечаянная Радость».
Молитвы святым праведным Богоотцам Иоакиму и Анне, родителям Пресвятой Богородицы
Молитва первая
из акафиста
О преславнии Христовы праведницы, святии Богоотцы Иоакиме и Анно, предстоящий Небесному престолу Великаго Царя и велие дерзновение к Нему имущиии, яко от Преблагословенныя Дщери вашея, Пречистыя Богородицы и Приснодевы Марии, воплотитися изволившему! К вам, яко многомощным предстателем и усердным о нас молитвенником, прибегаем мы, грешнии и недостойнии. Молите благость Его, яко да отвратит от нас гнев Свой, по делом нашим праведно на ны движимый, и да безчисленныя прегрешения наша презрев, обратит нас на путь покаяния и на стези заповедей Своих да утвердит нас. Таже молитвами вашими в мире живот наш сохраните и во всех благих благое поспешение испросите, вся яже к животу и благочестию потребная нам от Бога дарующе, от всяких напастей и бед и напрасныя смерти предстательством вашим нас избавляюще, и от всех враг видимых и невидимых защищающе, яко да тихое и безмолвное житие поживем во всяком благочестии и чистоте, и тако в мире временное сие житие прешедше, в вечный достигнем покой, идеже вашим святым умолением да сподобимся Небеснаго Царствия Христа Бога нашего, Емуже со Отцем и Пресвятым Духом подобает всякая слава, честь и поклонение во веки веков. Аминь.
Молитва вторая
из акафиста
О святии праведницы, Богоотцы Иоакиме и Анно! Молите Милосердаго Господа, яко да отвратит от нас гнев Свой, по делом нашим праведно на ны движимый, и да безчисленная прегрешения наша презрев, обратит нас, раб Божиих (имена), на путь покаяния, и на стезе заповедей Своих да утвердит нас. Таже молитвами вашими в мире жизнь нашу сохраните, и во всех благих благое поспешение испросите, вся к животу и благочестию потребная нам от Бога дарующе, от всяких напастей и бед и внезапныя смерти предстательством вашим нас избавляюще и от всех враг видимых и невидимых защищающе, и тако в мире временное сие житие прешедше, в вечный достигнем покой, идеже вашим святым умолением да сподобимся Небеснаго Царствия Христа Бога нашего, Емуже, со Отцем и Пресвятым Духом, подобает всякая слава, честь и поклонение во веки веков. Аминь.
Тропарь Богоотцам Иоакиму и Анне, глас 2
Праведных Твоих Иоакима и Анны, Господи, память празднующе, теми молим Тя, спаси души наша.
Ин тропарь, глас 1
Иже в законней благодати праведни бывше, Младенца Богоданнаго породиша нам, Иоаким и Анна. Темже днесь светло торжествует, весело празднующи, Божественная Церковь честную вашу память, славящи Бога, воздвигшаго рог спасения нам в дому Давидове.
