Читаем без скачивания Скифская история - Андрей Иванович Лызлов
Шрифт:
Интервал:
Закладка:
В сих же помянутых пределех обретаются страны, премного исполнены людми и всякими потребными, ибо которая страна обрестися может доволнее во пшеницу над Египет, Африку, Сирию и Асию, или которая область богатее во всякая сокровища паче Греческия, Венгерския и Фракийския области?!
Во всем Турецком государстве суть четыре града, неисчетных богатств исполнены. Яко Константинополь – многолюдственный город во всей Европе, мнят бо в нем народа милионов седмь и вящши. И аще то тако есть, то может учинити яко два Парижа, иже во Францыи.
Алепп – есть величайший град от всеа Сирии и воистинну средина, в него же привозятся вся купецкия вещи из всея Асии.
Каир– первое место имеет междо всеми прочими городами Африцкими, яко тамо несть инаго, иже бы могл прировнятися с ним [аще неции и равняют ему въправду великий город, названный Како], ибо Каир есть пристанищем не токмо богатств египетских и немалыя части африцких, но и индейских многих, отнюду же богатства, привезенныя Чермным морем, развожены бывают на верблюдах во страны, стоящия на море Междуземном.
Таурис– величайший град в государстве Персидском, его же взят Амурат султан лета 7095-го, и имеет в себе до двадесяти тысящ народа и богатства безчисленныя.
Сие государство Турецкое, от малых начатков поскочивши, тако высоко возрасте, яко зело браней ради страшно бысть христианом. Ему же благополучны войны бывают за причинами, данными от несогласий государей христианских, которыя причины умели они ко прибытку своему употребляти.
Вымыслы воинския, обыкновенныя турком, сия суть. Быти всегда готовым на войну. Упредити супостата. Употребляти прудкости дивной в наступлении, имети яко бы в руках силы готовыя. Не покушатися во едино время о войнах разных, не простирати войны нигде на долгое время. Не истощевати время и сокровищ на войны малопотребныя. Не обладати ничим прескачющи, но порядком: от места до места, от града до града.
Еще же и сие много помогало им, яко сами султаны их на многих войнах особами своими бывали. Такожде и иных вымыслов имеют немало, ими же род их отоманский облада государства премногая, и от лета седьмтысящнаго даже доныне толико примножали, елико до того лета содержали.
Управление и суд султана турецкаго совершенно есть владычественный. Ибо султан тако владеет всем, иже обретается в пределех его государства, яко жителие та мошнии не токмо подданными, но неволниками его называются.
И несть тамо ни единаго господина не токмо над домом своим, в нем же житие имеет, ни над землею, юже пашет, кроме некоторых родов, тем почтенных и пожалованных от султана Махомета Втораго в Константинополи.
Содержится султан при таковом самовластном господствовании двомя способами. Первым, еже отъемлет оружие от всех своих подданных. Вторым, яко вручает вся властелства в руки отступников христианския веры, их же он в дани место вземлет от подданных еще в малых летех.
И таковым вымыслом обретает к тому две потребныя вещи. Первая, яко отъемлет из стран тех цвет и крепость, юже бы от людей оны могли имети, ибо избирает отрочат твердых в теле и к воинскому делу способных. Вторая, яко теми же хранит и небоязненна чинит самаго себе, ибо янчары, взятыя в детских летех, и яко бы еще от персей матерних, и данныя в научение сему и овому, бывают непострегшися, паче же неволею махометены, и уже не знают ни отца, ни матери, но во всем утвержени суть от султанов, они же их питают, и одежды дают, и от них всех благих ожидают и прияти надеются вся своя доволства.
Крепость военная турков содержится в воинстве конном, в пехоте и в воинстве водном, в стрелбе раз личной и в денгах. Еже от страны казны денежныя, о том есть общее мнение, яко султан турецкий имеет общаго доходу осмь милионов шкутов на год. И аще мнится, яко с таковаго великаго государства могл бы доходов и множае имети, обаче не имеет.
Ибо турки не мыслят и не тщатся ни о чем ином, точию о броне и оружии военном. А воины средствии своими множае пустошат и погубляют, нежели населяют и богатят страны подданных, ибо многия воины, собравшися во едино место докончания ради дел воинских, тако ко убожеству приводят всенародство, яко едва оставляют им, чим бы могли глад точию утолити.
И тако подвластныя избывши надежды, яко не имут употребити не токмо богатств, их же бы могли приобрести трудами и промыслами своими, но ниже покоя малаго, не прилежат земледелству, ниже купечеству, разве токмо елико нужда их привлечет, паче елико неволя притиснет. Ибо, глаголют, чего ради имам то сеять, яже ин збирати будет? Или что собирать и готовить, еже ин ясти имать?
И того ради во областех султана турецкаго зело много пустынь безмерных и опустошенных стран несчетно, мало градов людных, но множае пустых стран. Во странах немецких бывает все великоценно от многолюдства, а у турков бывает от малолюдства, зане жителей тамошних помирает много вотще на путех [иже совершати понуждаются, везущи пищу и иныя потребы на пути те, ими же воинство идет], на арматах, то есть с воинством сущим на море в галерах или катаргах, ибо от десяти тысящей оных, иже из домов вземлены тамо бы вают, не возвращается их в домы и четвертая части; погибает же их толико от нужд, и от изменения воздуха, и от трудов великих, паче же того ради, егда турки расходятся на зиму с галер своих, а иныя оставлыпияся тамо и нимало обыкши морю и прочим нуждам тако погибают.
Еще и того ради доходы султанския не велми богаты: основание бо доходов государственных – земледелство и труды около его, то бо подает основание художествам, а художества купечеству; егда же земледелцов мало, тогда всего бывает недостаток.
Еще и сего ради, яко купечество и плавание с торгами вся суть в руках у жидов и у христиан европских: у гиспанцов, венетиан, у французов и у агличан. И яко в таковом великом крае, еже обладает султан в Европе, несть иных знаменитых градов, идеже
