Читаем без скачивания Преподобный Феодор Студит. Книга 3. Письма. Творения гимнографические. Эпиграммы. Слова - Феодор Студит

Живоносный Твой Крест похваляем Господи, и нас ради священная плоти Твоея страдания: копие же, заколения, посмеяния, оплевания, биения и заушения с багряницею, и венец терноплетенный, имиже от клятвы вся избавив спасл еси ны. Темже молим Тя, постов время мирно скончати подаждь нам.

В среду пятой седмицы

По 3-м стихословии седален, глас 2

Древо всесвятое, крестное воспевающе, крайней благости Твоей покланяемся присно Христе Боже: на сем бо упразднил еси силы вражия, и дал еси знамение верующим в Тя: темже благодарно вопием Ти: всех сподоби благодушно мирно живущих, исполнити постное время.

Крестобогородичен: Непорочнаго Пастыря Тя зрящи Агнца на Древо воздвижена, рыдающи матерски вопияше: Сыне, на смерть Тя осудиша неблагодарнии людие, за еже облак простерл еси в прехождение их (Исх. 13:21): увы Мне, безчадствуюся безмужная! но востани, и возсияй Солнце, и прославлюся в сынех земнородных.

Трипеснец. Глас 2

Песнь 3

Ирмос: Неплодствовавший мой ум, плодоносен Боже покажи ми, делателю добрых, насадителю благих, благоутробием Твоим.

За милосердие щедрот возшед на Крест, извлекл еси мя из рова страстей, и вознесл еси Христе, в небесная.

Простер на Кресте длани Твои Христе языки вся удаленныя от Тебе объял еси, близ стати державы Твоея.

Троичен: Триипостасная Единице, пресущная Троице, Божество едино, Отче и Сыне, и Душе правый, спаси чтущия Тя.

Богородичен: Кто хвалити Тя от земных, по достоянию возможет Мати Дево? Ты бо в женах едина явилася еси избранная, и всеблаженная.

Вознеслся еси на Кресте, прободен был еси в ребра, желчи вкусил еси мене ради, Иисусе, от преступления огорчившаго Тя.

Песнь 8

Ирмос: Гласы ангельскими на небесех славимаго Бога, восхвалим глаголюще, земнороднии, во вся веки.

Распеншагося плотски, и Божеством не пострадавша Иисуса, поют Ангели, и мы земнороднии во вся веки.

В распятии Твоем Христе, поносную смерть прием проклятую, спасл ны еси от тли избавивый.

Троичен: Херувимски Тя о Троице Свят, Свят Свят (Ис. 6:3), пою едино Божество, безначальное, простое и всеми непостижное.

Богородичен: Похвалами Тя Чистая, светло почитают вси роди: Зиждителя бо родила еси. О чудо страшное, и дело всеблаженное!

Вся претерпел еси пострадати о едином, еже спастися мне Христе: пою Твое распятие, гвоздия, и заколение во вся веки.

Хвалим, благословим, покланяемся Господеви:

Песнь 9

Ирмос: Девство Твое Богородице Нескверная, еже не опали огнь Божественный, величаем.

Волею претерпел еси распятися Спасе наш, да подаси всем жизнь, от смерти избавляя.

Древом умертвихся, и крестным Древом ожих: на немже Христос мой пригвоздився, врага моего умертви.

Троичен: Яко сущу Сыну с Родителем, и Духу Святому ссущу[1684], единомудренно поклонимся.

Богородичен: Чудо преславное, и ужасное слышание, како и яко Мати раждаеши Чистая, и не познала еси яко Дева тления?

Пою копие Твое, воспеваю и гвозди Твоя, губу, трость, Крест, имиже спасл мя еси Иисусе Боже.

Стихира на Господи воззвах, глас 8

Апостоли прехвальнии, мира молитвенницы, немощных врачеве, здравия хранителие, во обоем нас соблюдите, пощения время проходящия: во обоих божественно мирствующия, ум несмущен страстей храняще, да поем вси песнь Христу воскресшему, яко Победителю.

В четверток пятой седмицы[1685]

Трипеснец. Глас 8

Песнь 4

Ирмос: Услышах Господи, смотрения Твоего таинство, разумех дела Твоя, и прославих Твое Божество.

Апостольское всечестное ликостояние, Зиждителя всех молящее, проси помиловати ны восхваляющия тя.

Яко делателе суще Христовы апостоли, во всем мире божественным словом возделавшии, приносите плоды Ему всегда.

Виноград бысти Христов воистинну возлюбленный, вино бо духовное источисте миру апостоли.

Троичен: Преначальная, сообразная, всесильнейшая Троице святая, Отче, Слове и Душе святый, Боже, свете и животе, сохрани стадо Твое.

Богородичен: Радуйся, престоле огнезрачный, радуйся, светильниче свещеносный, радуйся, горо освящения, ковчеже жизни, святых святая сене.

Песнь 8

Ирмос: Безначальнаго Царя славы, Егоже трепещут небесныя Силы пойте священницы, людие превозносите во вся веки.

Духа началохитростием создавше всю Церковь апостоли Христовы, в ней благословите Христа во веки.

Вострубивше трубою учений, низвергоша апостоли всю лесть идольскую, Христа превозносяще во вся веки.

Апостоли, доброе преселение, назирателие мира, и небеснии жителие, вас присно восхваляющия, избавите от бед.

Троичен: Трисолнечное всесветлое Богоначалие, единославное и единопрестольное Естество, Отче вседетелю, Сыне, и Божественный Душе, пою Тя во веки.

Богородичен: Яко честный и превышший престол, воспоим Божию Матерь непрестанно, людие, едину по рождестве Матерь и Деву.

Песнь 9

Ирмос: Тя небесе и земли ходатаицу вси роди ублажаем: плотски бо вселися в Тя исполнение, Дево, Божества.

Тя благославное апостольское собрание, песньми величаем: вселенней бо светила светлая явистеся, прелесть отгоняще.

Благовестною мрежею вашею, словесныя рыбы уловивше (ср. Мф. 4:19), сия приносите всегда снедь Христу, апостоли блаженнии.

К Богу вашим прошением помяните нас апостоли, от всякаго избавитися искушения, молимся, любовию воспевающия вас.

Троичен: Тя триипостасную Единицу, Отче, Сыне, со Духом, Единаго Бога единосущна пою, Троицу единосильную и безначальную.

Богородичен: Тя Детородительницу и Деву, вси роди ублажаем, яко Тобою избавльшеся от клятвы: радость бо нам родила еси Господа.

Стихира на Господи воззвах, глас 6

Животворящему покланяющеся Твоему Кресту, неизреченныя к нам безмерныя Твоея благости Христе, и тем просветивше души, воспеваем Тя непрестанно, просяще благодушно, радостию скончати поприще пощения, и достигнути страсти Твоя воспети Господи, имиже спасл еси ны.

B пяток пятой седмицы

По 3-м стихословии седален, глас 6

Кресте, миру хранителю, демонов прогонителю, тя стяжавших во всем предстательство необоримое сподоби пощения прейти прочее, совестию чистою, исправляя души наша пред Христом, древо благословенное.

Крестобогородичен: Чистая Дево и Честная, Ангелов славо, егда предстояла еси Кресту Сына и Бога Твоего, не терпящи зрети поругания врагов, взывала еси болящи матерски: како терпиши, о Человеколюбче, всех прещения? Слава долготерпению Твоему.

Трипеснец. Глас 6

Песнь 5

Ирмос: От нощи утренююща, Человеколюбче, просвети молюся, и настави и мене на повеления Твоя, и научи мя Спасе, творити волю Твою.

На Кресте руце Твои Человеколюбче распростерл еси, и гвоздьми пригвоздиша, и ребра копием прободоша иудее, и терпиши вся Христе, да мы спасемся.

Древа снедию умре иногда Адам (ср. Быт. 2:19), паки же обрете Древом крестным жизнь, имже щедрот наслаждается пищи внутрь рая.

Троичен: Едину Естеством Тя Троице воспеваю, безначальную, несозданную, начальственную, царственную, пресовершенную Единицу, Бога, и Свет, и Жизнь, Зиждителя миру.

Богородичен: В преестественном Твоем рождестве Чистая, законы естества Тобою разрешаются яве: ибо безсеменно раждаеши превечнаго Бога, от Отца рожденнаго.

Крест, копие, и гвоздия Твоя почитаем Владыко: теми бо от тли нас избавил еси, Твоею страстию Христе, обезсмертствовавшихся.

Песнь 8

Ирмос: Отроков песнь воспоим Христу, поюще с ними: да благословит вся тварь Господа, и превозносит во вся веки.

Распинается Христос, и оживляемь аз пою со отроки: благословите дела Господня Господа и превозносите Его во веки.

Мир от тли распятием Твоим избавивыйся, поет со отроки: благословите дела Господня Господа и превозносите Его во веки.

Троичен: Троице равнославимая, пресущная Единице, Отче, и Сыне, и Душе, спаси верою поющия Тя.

Богородичен: Рождеству Чистыя Богородицы покланяюся, поя со отроки: благословите дела Господня Господа, и превозносите Его во веки.

Пою Твой Крест, имже спасл мя еси Христе, поя со отроки: благословите дела Господня Господа, и превозносите Его во веки.

Песнь 9

Ирмос: Безсеменнаго зачатия Рождество несказанное, Матере безмужныя нетленен Плод, Божие бо Рождение обновляет естества. Темже Тя вси роди, яко Богоневестную Матерь православно величаем.